So en Schbaziergang dorch de Hardtwald kann immer widder inschbirierend sei un die Kreativität fördere.
Dodebei kann dann zum Beischbiel so ebbes entschteh:
Hardtwald Herbscht-Limerick
Mir raschle dorch d‘ Hagsfelder Allee,
em Herbscht gebts do immer was zu seh‘
un wie mer so trotte
dorch die Blädder am Bodde
schdeht fümf Meder vor uns e Reh.
Gottseidank isch’s koi wilde Sau,
den Unnerschied kenne genau.
Un wie mer noch gugge
duht des Reh ganz korz zugge
un verschwindt mit’me Satz em Verhau.
Liewe Leit,
endlich ischs widder so weit dass mir von de „Alt-Neereder Schul zu unserm von vielene schon lang ersehnte Mundart-Owed, ‘s isch inzwische scho zum neinzehnde Mol, ei’lade. Des isch übrigens unser letschder Mundart-Owed (vor’em Gemoindehaus-Umbau, der jo dann im Dezember a’fange soll). Also, nutzet die G’legehoit un kommet zahlreich, wer woiß wie’s noch dem Umbau weidergeht un ob mer während dem Umbau irgendwo e Ausweich-„Wohnzimmer“ griege könne.
Mir viere (un nadierlich a die Nutznießer vom Diakonie-Veroi) froie uns saumäßich uf e volle Hütt mit viele bekannte un sicher a widder e paar neie G’sichter.
Wie’s inzwische scho e gewisse Tradition hat, mache mer a desmol koin Vorverkauf. Mer kann jetzt am Samsdag, de 8. November ab de Sechse uf gut Glück ins Neereder Gemoindehaus in de Kirchfeldschdrohß 149 komme odder mer isch clever un sichert sich sein Platz vorab telefonisch bei mir unner 0721-785776 (wanne ebber net dehoim sei sott, nemmt die Reservierung a gern mein AB entgege), beim Martin (0721-704600) odder gern a per E-Mail (altneerederschul@arcor.de).
De Ei’trittspreis bleibt (a scho traditiomell) wie die ganze letschde Johre bei 10 Euro glatt un wammer bedenkt, wie inzwische die Inflation zug‘schlage hat, isch des doch saumäßig billich un halwer gschenkt. Wer will -un kann- derf nadierlich gern a meh gewwe, weil jo de gesamte Erlös von derre Vera’schdaldung, a aus de Bewirtung, em Diakonie-Veroi zu gut kommt. Un die könne jeden Cent brauche.
Also, üwerleget net lang un meldet eich a odder vertrauet uf eier Glück un kommet u’a’gmeldt am 8. November oifach so ens Gemoindehaus. Ei’lass isch ab de Sechse, ‘s Programm geht dann em Siwwene los (odder korz denoch, wegger de Glocke!).
Adschee bis dort na
sagt de Roland (Alt-Neereder Schul-Rekdor ehre’halwer) Un ihr wisset jo: Wer net kommt isch selwer schuld!!!
In Neered isch mar kleffer un mar duht scho frieh an Weihnachde denge, Mar iwwerlegt, wie kann ich dann blos was gscheide vorschenge, Ich kann eich helfe, kann eich sare was´d Leit so schätze, nemmet en Kolenner oder e Buch un e CD von de Mundart, so wie mir schwetze. Des isch gut, do kommeder immer prima mit ann, un es daugt vor a Fraa genauso gut wie vor en Mann.
© Martin Bruchmann
Es isch morgens em sechse,
ich kann nemme schlofe.
Gedange komme un gehn.
Ich laaf eloi am Meer entlang,
Schaumflege uff meim Weg,
grad wie en meim Kopf.
De Bodde voll mit leere Muschle,
ich kenntse alle mit Gedange fille.
Ich wach langsam uff,
kaldes Wasser umspielt mein nagiche Fieß.
Komm von meine Gedangeausflüg widder zrick,
genieß die friesche Bries
un dend an die warme Wegglen zum Friehschdick.
© Martin Bruchmann
So en scheene Landrege der duht jetzt gut. Sachde falle die Trepfle en mei Garde. Meine frisch gsetzte Tomade duhd der Setzrege richdich gut.Vor mei Blume die wo ausem Windergarde wieder ens frei komme sinn, isch des die roinschd Wellnessdusche. Mar kanne grad zu gugge wie se ihre Blädder dene Tropfe entgegeschdregge um jo koiner auszulasse, das der ganze Winterschdab wieder runnergwesche werd. Die Brimmele fange a wieder uffzublie, weil mar sagt net umsonschde: „Wennd me net giesch gehe ei wie e Briemele!“ Do hogge an meim Fenschder un gug en de Garde naus. D´Amsle un Schpatze dun en de erschde Pfütze bade. So en warme Rege isch hald a vor die Viecher was scheens. Ich hogg immer noch uff meim Schduhl un gug en de Garde. Ich kann jo drauße nix schaffe bei dem Rege. So en Rege hat hald doch viel gude Seide.
Ich heb mar ausem Keller e scheen kiels Bierle kohlt un genies oifach des scheen nixdu.
Aus de Kiche ruft mei Fraa: „Wie siehds aus, regert immer noch, nor kanschmar en de Kiche helfe abdroggne un en de Schdub emol Ordnung en dei Babiere bringe, drauße kansch jo doch nix mache!“
Orgendlich hats jetzt grad gnung gregert mer mussses jo net iwwerdreibe. Liewer schalde heit dowet mein Gardeschbrenzer wieder ei.
© Martin Bruchmann
„Mondkur in “Bad“ Neeret, de zwoide Ufguss“
Große Ufregung im Kurort in spe „Bad Neeret“. En alder „Zinkener“ isch bei de Brunne’bohrung uf seim Grundschdück im Diefgschdad uf e Quell gschdoße mit mineralhaldichem Wasser (Eise, Zink, Sulfat un so weider).
Gschäftsdüchdich, wie halt alle Neereder so sin, hat er in seinere Scheier glei die „Kurklinik Heil“ ei’grichded, um mit seinere Fraa Clementine eine schdreng uf’em Mondkalender beruhende „Mondkur“ mit verschiedenschde A’wendunge (z.B. als Trinkkur, Badekur odder Schlammkur mit Packunge vom Altrhei‘-Schlamm) a’zubiede.
Als Unnerschützung un „Mädle für Alles“ hat er den alde Hoiner engagiert, e echdes Neereder Original, der wo vom Gäscht abhole bis zu de Kurpackunge alles im Griff hat.
Die erschde Kurgäscht treffe a schon ei, alles so e bissle verschrobene Privatleit, denne wo für ihre Gsundhoit nix zu deier isch. Do gebts zum Beischbiel die Frau Anna-Amalie von Krayenhorst -ihr verblichener Gemahl Hans-Hubert war üwer en Schwippschwager dritten Grades direkt mit dem Koiser Wilhelm verwandt- un ihr Adoptivsohn Heinz-Rüdiger, un der erfolgreiche Unnernehmer (Kurzwaren en Gros un en Detail) Emil Bolle direkt aus de Hauptschdadt.
Um noch meh Werbung zu mache, will der Kurdirektor mit Unnerschützung von seinere Tochter Vanessa, die newebei a für des Fitnessprogramm von de Kurgäscht zuschdändich isch, kloine Werbespots für TikTok produziere. Außerdem hat er den KIT-Student Mike Gabler als „Wasserdirektor“ eigschdellt, der mit’ere chemische Analyse die gsundhoitsförderne Wirkung von seim Heilwasser beschdädiche soll.
Der Mike isch awer a de Bruder von de Vanessa ihrem Freind, der wo zur Zeit grad in Auschdralie e Auslands-Praktikum absolviert, un soll so e bissle uf die Vanessa ufbasse.
Un schon ischs bassiert: Der Heinz-Rüdiger bändelt bei’eme Tete-a-Tete vor de verschlossene Tür mit de Vanessa a, un de Mike versucht mit Unnerschdützung vom Hoiner die drohende Gefahr abzuwehre. Zumal sich die Frau Heil in Gedanke scho in Adelskroise sieht un ihre Vanessa zu de „Diana“ von Neeret mache will.
Ob des klappt un zu wellem Ergebnis die Analyse von dem Heilwasser kommt, wird am End von dem turbulente Schtück zur allgemoine Erheiterung ufg’löst.
Komme Se, lache Se, un duhn Se debei a noch ebbes Gutes, weil de Erlös von denne Ufführunge (Ei’tritts- un Bewirtungsgelder) wie immer vollschdändich un ohne Abzüg für soziale Ei’richdunge in Neureut zur Verfügung gschdellt wird.
Also, mir seh‘‘n uns dann am 15., 16. un 23. März im Gemoindehaus Nord.
Un wer net kommt isch selwer schuld!!!!
PS: Reservierunge telefonisch unner 0721-785776 odder 0721-704600,
per E-Mail unner altneerederschul@arcor.de
Alt-Neereder Schul 